1. Hasiera

Donejakue bideak eta etapak

Eroski Consumerren Donejakue Bideko gida berriak zenbait ideia eskaintzen dizkizu zure helburuetara hobekien egokitzen den bidea aukeratu dezazun

Zorionak, hartu duzu-eta dagoeneko erabakirik garrantzitsuena: Donejakue Bidea egitea! Hemendik aurrera, beste kontu asko erabaki beharko dituzu: zer ibilbide aukeratu, non lo egin, zer ikusi… Horregatik lagundu nahi dizugu. Eroski Consumerren Donejakue Bideko gida berrian, informazio eta xehetasun eguneratu gehiago aurkituko dituzu ondoena egokitzen zaizun bidea hauta dezazun. Honelako zalantza eta galderen erantzunak aurkituko dituzu han: zein bide egokitzen den zure behar fisikoetara edo daukazun denborara, zein bide den interesgarriena zure jakin-mina asetzeko, zeinek duen arkitektura edo historia interesgarriena, eta abar.

Ultreia eta bide on!

Donejakue bidea

Bide eta etapa kopurua

Donejakue Bidea kontinente zaharreko erromes-biderik zaharrena, jendetsuena eta ospetsuena izan da, eta izaten jarraitzen du. Hamabi bide ditu ofizialki onartuak, baina gehiago ere badira. Hamabi bide horiek 172 etapa dituzte guztira, eta denak daude Santiagora doazen erromesak noiz zeharkatuko zain. Guztira, 1.500 km baino gehiago, gezi horiz, paisaiaz eta legendaz beteak.

Hala ere, bide guztiak ez dira berdinak. Bakoitzak bere zailtasunak ditu, bere orografia eta bere bide-zorua. Bide batzuk bidezidorrak edo pistak dira; beste batzuk errepidezkoak dira, eta, beste askotan, txandakatu behar dira igoera piko-pikoak, bide “hanka-apurtzaile” ospetsu horietakoak, eta jaitsiera gogorrak, aldez aurretik ondo prestatuta egotea eskatzen dutenak, bidea amaitzea eragotziko diguten tendinitisik eta gihar-arazorik izan nahi ez baduzu behintzat.